افهم خوفك: 4 طرق لمواجهة الخوف.. يا تهزمه يا يهزمك

الخوف هو شعور ملازم للجنس البشري. كلنا بدون استثناء بنمرّ بيه مع اختلاف الأسباب. ورغم تعدد الآراء في توصيف الشجاعة إلا أنّي بأيّد الفلسفة اللي بتقول: «إن الشجاع مش الشخص اللي مش بيخاف. الشجاع هو الشخص اللي بيقدر يتحكم في خوفه». يعني كونك شجاع لا ينفي ـ أبدًا ـ شعورك الفطري بالخوف. علشان كده انت محتاج تعرف ازاي تواجه خوفك وماتنكرش إحساسك بيه.

 كتبت ـ مريم البغدادي
الخوف في بدايته بيبقي حالة رهبة شديدة، بنحسّ بيها تجاه موقف معين. وهنا بيبدأ هرمون «الأدرينالين» في تحفيز المخ على زيادة طاقة الجسم، وجمع المعلومات بشكل أسرع من الطبيعي. وبيستمر تأثير الأدرينالين في الجسم مدة توصل لساعة، لحد ما الخوف يقل بشكل تدريجي، وفي النهاية يختفي.
هرمون «الأدرينالين» هو أهم وسيلة بيسخدمها الجسم علشان يواجه بيها الخوف، وباقي المهمة بيقوم بيها العقل، اللي بيختار هيستجيب إزاي للموقف. والأستجابات دي لخصها علماء علم النفس في مصطلح سموه «4F». وهو اختصار لأربع كلمات بتبدأ بحرف الـ «F».
أول كلمة هي «Flight» وتعني الهروب من الموقف وإخلاء مسؤليتك عنه، مهما كانت عواقب الهروب وخيمة.
الكلمة التانية هي «Freeze» أي التجمد. في الحالة دي استجابتك للخوف بتكون في شكل الصمت والاستسلام للوضع، وبالتالي انت لا بتتقدم خطوة للحل ولا بتهرب بخطوة لورا، الثبات هو المسيطر.
المفردة التالتة هي «Fight» وتعني التحفز للقتال أو المجابهة، وهنا أول ما بتحس بالخوف بتعلن الحرب، لكن من غير ما تعرف هو مين عدوك، وأيه هي الأسلحة المناسبة للحرب دي.
الكلمة الرابعة والأخيرة هى «Face» والمقصود بيها مواجهة الموقف. بمعني أنك بعد ما تقبلت احساسك بالخوف، وحطيت خطة علشان تحاربه بهدف أنك تطلع من الحرب دي بأقل خساير ممكنة.
ـ انتهي تعريف المصطلح ـ
تعالي دلوقتي أوضح لك الأربع استجابات في مثال بسيط، وانت بنفسك اللي هتحدد أيه الإستجابة الأفضل.
نفترض أنّ عنّدك امتحان بكرة وانت مش مذاكر، قدامك 4 ردود فعل:
الأول، أنك تفتح الكتب وتفضل سرحان وتسلم نفسك لخيالك اللي هيصولك فشلك الحتمي.
التاني، أنك تهرب من كمّ المذاكرة والقلق، إمّا بالنوم أو الخروج.
التالت، أنك تدخل في حالة عصبية، وتزعق مع أي حد من غير سبب منطقي.
رد الفعل الرابع والأخير أنك تشوف فاضل كام ساعة على الإمتحان، وتحسب قُدّامك ورق قدّ أيه، وتبدأ تخلص أكبر قدر ممكن تنجزه في المذكرة، وتنزل الامتحان.
الأكيد إنك وانت بتقرأ دلوقتي اخترت رد الفعل الأخير (المواجهة) لكن ده مايمنعش أنك في حياتك مرات كتير أوي اخترت بدايل تانية تواجه بيها خوفك، زي الهروب أو التجمُد.
طيب ليه؟
الإجابة أنّ العقل البشري كسول جداً، بيدور على الحل الأسهل اللي مش هيبذل فيه مجهود كبير، فمن الطبيعي هيفضّل الهروب من المواجهة، والشاطر هنا اللي يجبِر عقله علي مواجهة الموقف.
ماتسبش خوفك يسيطر عليك. خُد نفس عميق، وابدأ تفكير. استثمر وقتك في الوصول لحل، بدل ما تتخيّل سيناريوهات الفشل. واعرف أنّ «الخاسر الحقيقي هو الهارب وليس المهزوم.»
وقتها بس هتوصل للحل، يمكن صحيح ماتقفلش الامتحان، لكن الأكيد أنّك هتنجح فيه.