ماريونتاية - قصيدة

(1)
والصدفة جت حسب الميعاد
مديت إديّه للسما
دُقت السلام
والسُمرا زي الشمس.. يا سمرا
تلسع القلب المـُسالم
اللي حبك حب يجهل لاحتمال
وإن كان هواكِ قدر..
مطر..
نجماية ملهاش في السهر..
دوّت نصيب
الحب مش رهن السؤال
زي السمار يا "سمرا " من بعدك
ما أحتكر كل الجمال

(2)
بين قلبي وهواكِ خيوط
ممدوده شوق
داخلين على 30 سنة
واحنا مازلنا مشبوكين
قلبي انولد بخيوط حرير
شبكة إديكِ الطيبين
بيني وبينك ألف عام
بينك وبيني كوم سنين
ما حال للحظة البعاد
إني أكون مقتول عنيكِ.. الوسعانين
الدفيانين
المسحوبين
المرسومين جوايا شوق
ولوز.. وتين

(3)
يا ماريونتايه
يا سكنه روحى كالقمر
ارخى الخيوط
خليني أرقص رقصتي
حسّك قوي
والحسّ عطشان ينطقك
اسمك طِعِم.. لكنه سر
بردده وحدي في أمان
ياللي عشقتك من زمان
داخلين على 30 سنة
واحنا مازلنا مشبوكين
قلبي خلاص
خلاص.. خلاص
أكله الحنين.

شعر | أحمد الرومي
من ديوان «حتة وطن» - الطبعة الأولي يوليو ٢٠١٣