من وش مصرية

(1)
وشّك يا مصرية
سبحان من رسمه
سبحان من قسّمه
على القلوب كافة
سبحانه مَن علمه
فعل الملاغية
درسين وبتعلمه
أنثى ونجمية معجونة بالخفة
الرفّة من جفنها تلعب بنا الرفة
رغم المدارية
 
كل النساء كافة
وأنتِ اللي ف الكفّة
على صوت غناكِ القمح
بجلاله اتسنبل
ف ضوء كانون شفناه
غافي بيتدفّى
على وشّ مصرية

(2)
وشّك يا مصرية
بيضج بالثورات
فوق خدّك الونّاس
الضحكة تبقى حارات
من درب غمّازة
عيلها م الجنة
صخبها ليه رنة
ينفع يكون مادنه بترشرش الإيمان
ومدرسة خارجة
أولادها بتضايق
ف بنات حديثي النهد
عايقة وتتعايق لجل الملاغية
تعشقها تلميذة
تلقاها جنّية
طفلة رومانسية فوق الجمال حافية
ماسكة ف كراسة
متروسة جغرافيا حُسنك يا مصرية
على كفها تتولد
وف حضنها تتلحد
يا بخت مين ينحسد بنظرة عسلية
من وشّ مصرية

(3)
وشّك يا مصرية
فيه الدفا وددّاد
هَرْس القلوب غِيّته.. فيه الحياء غلاب
حجّار مع الحجري
مع الحديد.. حداد
صنايعي عشق وهوى
وكله بالمقاسات
فصلت عنده أنا
كلمة تراضيني
بوسة تقوّتني
همسة تصحيني
لفتة تموتني
نوتة تفكرني بناس ماتعرفنيش
وناس تعرّفني
سر الحياة نغابيش
ع القلب مرسومة
وقطن في المحلاج
زاهد بيتقطّن
على وشّ مصرية

(4)
صنايعي عشق وهوى
وكله بالمقاسات
احفظ بقى ابعادي يا اسطى
وفصل لي
"بفيونة" لاعصابي
و"بفتّة" لمشاعري
كرافاتة ف رقبتي
وطاقية فوق شعري
وجاكتة تحميني
جلبية تسترني
أفرول يقويني
وراية تنصرني
ولا حد يكسرني.. غير رب ذاك الوش
روحوا فصلوا عنده
الورشة ما تتوهش
عنوانها تفصيلي
"على ضفتين نيلي"
لو رحت بس اسأل
فين وش مصرية؟

شعر ـ أحمد الرومي
من ديوان "حتة وطن" عن دار أكتب للنشر والتوزيع

اللوحة بريشة ـ سارة الحسيني