عشمك ما بين السما والأرض

فوتوغرافيا ـ عبد الرحمن النجار  

كام مرّة اتعشمت في حَدّ، صديق، قريب، حبيب وخذلك. كام مرّة قلت «أنا مش زعلان منك، بس عشمى فيك كان زيادة حبتين». كام مرّة اتعشمت أنك تكون جنب فلان في أيّ موقف، وفلان ما قدرش ده. كام مرّة سمعت فيها كلمة «عادي» أو «معلش» من شخص كنت عشمان فيه أنّه يقف جنبك.

كتبت ـ مروة محمد
العشم كلمة ليها جوهر مختلف، مضمونها أكبر بكتير من عدد حروف نطقها. نابع من القلب قبل اللسان. ترتيب مكانة الناس بيحدد درجة عشمنا فيهم، مثلا درجة العشم في صاحب العمر تختلف عن عشم زميل العمل.
أنا عشمان فيك هو عقد شراكة، عربونه مواقف، عشرة عمر، جدعنة، إحساس وأولويات طرف آخر، أيًّا كانت إيه على حساب الطرف التاني. وده مش من السهل إنه يحصل، ومش إلزام ولا إجبار على أىّ طرف من الطرفين. يعنى مثلًا اتنين أصحاب من أيام المدرسة مع بعض في كل خطوة في الفرح، والحزن، والألم وواحد منهم تعب أوي ودخل المستشفى، وهيعمل عملية، فبلّغ صاحب عمره بكده، بس صاحبه ما كانش جنبه وقت العملية وما فكرش حتى يزوره مرّة في المستشفى. ولا يكلمه يتطمن عليه حتى بالتليفون. بعد شهرين راح زاره في بيته بعد ما اتعافى لوحده، شرح له ظروفه فردّ عليه صاحبه يقوله «أنا كنت متعشم فيك تبقى جنبي وقتها».
العشم على قدر المحبة، كل ما محبة فلان زادت في قلبك، كل ما اتعشمت فيه أكتر. بس هي مش قاعدة ثابتة، ممكن حدّ قريب منك جدًا، بتحبه أوي، تتعشم فيه في موقف ما، يقف جنبك يكون أول حد يساندك، بس تتفاجئ إنّه مش حواليك. أو مثلًا تنجح وتنتظر دعم من أقرب شخص ليك، ويخذلك بإنه يقولك «جاي عليك من ده كله بإيه».
اتعشم زيّ ما أنت عايز، بس فكر، رتّب مين أولى تتعشم فيه ومين لأ. قلل سقف توقعاتك في العشم، قدّر مبررات كل شخص حواليك. دايرة العشم الخاصة بيك اعرف واجه حقيقة إننا بشر، كلنا مش زىّ بعض، إذا كانت صوابع إيديك مش زيّ بعضها، فما بالك بقلوب البشر وعقولهم وتصرفاتهم في المواقف.
العشم ممكن يكون نعمة، لو فهمنا معناها بعقلنا قبل قلبنا، في نفس اللحظة ممكن يكون نقمة، لو خليتنا نتغير من جوانا، ونغيّر قيمنا اللي اتربينا عليها، لمجرد إن شخص خذلنا في درجة عشمنا فيه.